Personal nga mibisita si Pangulong Ferdinand Marcos Jr. sa Naga City aron inspeksyunon ang mga proyekto ubos sa Oplan Kontra Baha, usa ka flood mitigation initiative sa nasudnong gobyerno.
Kauban niya sa pagbisita si Mayor Leni Robredo, nga kanhi Bise Presidente ug kaniadto nakigbatok usab sa pangulo sa miaging presidential race.
Naa usab sa maong kalihukan si Public Works Secretary Vince Dizon.
Sa iyang pahayag, gibutyag ni Pang. Marcos nga ang biyahe nakapukos sa serbisyo publiko ug dili sa pulitika, bisan pa sa mga espekulasyon nga posibleng adunay bag-ong alyansa alang sa Eleksyon 2028.
Bisan og iyang giingong dili politikal ang pagbisita, gipakita sa Pangulo sa mga mitambong ang iyang pink nga medyas isip “pagrespeto” sumala pa kang Mayor Robredo, nga migamit sa kolor pink sa iyang presidential campaign niadtong 2022.
Gipangunahan sa Pangulo ang inspeksyon sa mga waterways ug drainage systems sa Naga, nga kabahin sa multi-agency desilting ug rehabilitation program aron mapalig-on ang flood control system sa siyudad.
“Serbisyo una bago pulitika,” matud ni Marcos, ug iyang gibutyag nga ang ilahang panag-uban nakatutok sa kaayohan sa mga residente sa Naga.
Gitawag sa Pangulo ang pink socks gesture nga “pinaka-politikal nga butang” nga iyang gihimo ning adlawa, apan giingon niya nga ang kinatibuk-ang pagbisita “strictly work” o puro trabaho lamang.
Nahimong sentro sa diskusyon ang pagbisita taliwala sa mga istorya kabahin sa posibleng bag-ong alyansa sa pulitika, apan parehong miingon sila Marcos ug Robredo nga ang ilang kooperasyon nagpunting sa public service ug disaster preparedness.
Alang sa pipila ka observers, ang pagbisita ug ang pink socks gesture simbolo sa respeto ug propesyonal nga panag-uban.
