Gipahibalo sa Department of Agriculture (DA) nga sugdan na ang implementasyon ug pagbaligya sa P20 kada kilo nga bugas sa Visayas region sa sunod semana.
Gihimo ang maong anunsyo pagkahuman sa usa ka closed-door meeting kagahapong adlawa uban ni Pang. Ferdinand Marcos Jr. ug 12 ka gobernador sa Visayas, nga gipahigayon sa Kapitolyo. Usa sa mga gisgutan sa maong miting mao ang paunang implementasyon sa saad ni Marcos sa kampanya nga ipaubos ang presyo sa bugas ngadto sa P20 kada kilo.
Gibutyag ni Department of Agriculture Secretary Francisco Tiu Laurel Jr. nga nakig-alayon ang nasudnong gobyerno pinaagi sa DA sa mga lokal nga kagamhanan aron mapatuman ang programa. Matod niya, duha ka template ang ilang gi-evaluate: ang una, 5 ka kilos kada semana matag pamilya; ug ang ikaduha, 10 kilos kada semana.
Dugang pa ni Laurel, molungtad lamang ang programa hangtod Disyembre karong tuiga, apan nagmando na si Pangulong Marcos nga maghimo og plano aron mahimong sustainable kini hangtod sa tuig 2028. Iyang gipahayag nga labihan gayud kini nga gikinahanglan sa mga tawo sa rehiyon, ug aron mapagawas na usab ang mga stock nga anaa sa mga bodega.
Giklaro ni Laurel nga punô gihapon ang ilang mga bodega sa bugas ug palay, nga miabot na sa 358,000 ka tonelada. Usa kini sa mga rason nganong kinahanglan na ipatuman ang programa. Nanghinaut ang kalihim nga magmalampuson ang programa ug nga ang mga lokal nga panggamhanan motambayayong aron mapahimuslan kini sa katawhan pinaagi sa pagpalit og mas barato nga bugas.
