DAVAO CITY – Human nga nagmalampuson ang unang adlaw sa COVID-19 vaccination sa Pediatric A3 group sa Dakbayan sa Davao, mihangyo ang Vaccination Cluster ngadto sa mga ginikanan nga dunay mga 12-17 anyos nga mga anak nga dili usa mudagsang sa mga city-controlled vaccination hubs aron ipabakuna ang ilang mga menor de edad.
Gipasabot usab sa maong cluster nga wala pa nagsugod ang pagpabakuna sa tanang mga menor de edad sanglit limitado pa lang kini sa mga dunay comorbidities, ug sa mga pili nga ospital lang kini ginapahigayon.
Nag-abiso usab sila nga maghulat sa anunsyo sa gobyerno kung kanus-a masugdan ang vaccination alang sa mga batan-ong walay comorbidities.
Kagahapon, gipahigayon sa Southern Philippines Medical Center ang unang adlaw sa Pediatric A3 vaccination, diin gatusan ka mga bata edad 12-17 ang nakadawat sa ilang unang dose sa COVID-19 vaccine.
