DAVAO CITY – Gilauman nga hingpit nang makompleto ang pagbakuna sa tanang mga healthcare workers sa dakbayan sa Dabaw karong semanaha.
Gikanayon ni Dr. Josephine Villafuerte, head sa vaccination program sa dakbayan sa Dabaw nga hapit na mahuman ang pagpahigayon sa first dose sa pagbakuna batok covid 19 sa mga heathcare workers gikan sa Southern Philippines medical center ug sa uban pang mga pribadong ospital ning syudad.
Samtang, ugmang adlawa gikatakda na usab nga abrihan ang laing covid vaccination site nga gipahimutang sa magallanes Elementary School diin bakunahan dinhi ang mga public health frontliners.
Dugang pa ni Villafuerte nga kinahanglan nga mahurot ug bakuna ang tanang mga medical frontliners sa syudad aron aduna kini panagang batok covid 19 ilabi na karon nga subling mitaas na usab ang kaso didto sa kauluhan ug sa cebu city gawas pa sa pagsulod na usab sa mga bag-ong matang sa virus.
Sa pikas bahin, gitin-aw usab ni Villafuerte nga maka-avail lamang gihapon sa libre nga bakuna ang mga naka-recover gikan sa covid 19.
Subay sa guidelines sa DOH human ang 90 ka adlaw gikan sa pagka-recover sa usaka covid positive ug sa himuong pagpanubay samga doktor mamahimo nang mabakunahan ang mga kanhi nataptan sa virus.
