DAVAO CITY – Subling ibalik karong adlawa ang pagbakuna sa mga public healthcare workers sa dakbayan sa dabaw nga ipahigayon sa Magallanes Elementary School.
Una ng gibutyag ni Dr. Josephine Villafuerte, ang head sa Vaccination Cluster sa Davao City Covid-19 Task Force nga gikansela ang pagtuplok og bakunang AstraZeneca kagahapong adlawa.
Kini gumikan sa mga mikuyanap nga balita nga miresulta usab sa ilang pagka-alarma nga base sa gikataho nga pipila ka mga nasud sa Europa ang misuspende sa ilang AstraZeneca vaccination human nakasinati ug blood clot ang mga natuplukan sa nahisgutang bakuna.
Apan gikumpirma sa opsiyal nga karong adlawa ipadayon nila ang pagbakuna human madawat ang advisory gikan sa Department of Health.
Dili lamang usab angayang mabalaka ang publiko sanglit moabot na usab sa mosunod nga mga adlaw ang dugang astrazeneca vaccines nga gipalit sa lokal nga kagamhanan aron mabakunahan ang dul-an 1.2 million ka katawhan sa syudad aron maangkon ang herd immunity batok covid 19.
Hinuon, gipasalig sa DOH ug FDA nga hugot i-monitor ang vaccine deployment program nasud.
