DAVAO CITY – Sugdan na karong adlawa ang pagbakuna sa tanang nanarbaho isip drivers sa mga pampublikong transportasyon dinhi sa Dakbayan sa Davao.
Gina-awhag sab sa lokal nga kagamhanan nga mutungha ang mga transport groups ngadto sa vaccination site nga gitagana kanila sa Agro Industrial Foundation College of the Philippines campus, nga nahimutang sa Quimpo Boulevard ning syudad.
Kinahanglan lang dalhon sa mga public utility vehicle drivers ang ilang lisensya o PUV ID ngadto sa vaccination site.
Mulungtad ang pagbakuna sa mga PUV driver gikan Hulyo 3 hangtod Hulyo 22.
Kabahin ang maong programa sa pagsugod sa pagbakuna sa A4 priority group kon frontline workers in essential sectors dinhi sa Dakbayan.
Sa kasamtangan, 6,647 na ang nakadawat og first dose gikan sa nahisgutang grupo.
Kahinumduman nga ang mga driver sab sa mga pampublikong sakyanan ang nahatagan ug prayoridad sa gipahigayon nga community surveillance human nga expose ang mga nahisgutan sa bisan kinsa nga mga pasahero ug taas ang risgo niini nga matakdan sa virus.
