DAVAO CITY – Gipahibalo karun sa lokal nga kagamhanan sa Mati Davao Oriental nga temporaryo una nga suspendido ang gipahigayon nga pagbakuna sa mga bata nga edad 5-11 anyos.
Gikanayong nagkulang na matud ang supply sa bakuna ug kinahanglan pa nila nga hulaton ang pag-abot niini.
Hinuon ipahibalo lamang sumala pa nila pinaagi sa ilang Facebook page kung kanus-a nila ipadayon ang pagbakuna sa nahisgutan nga age group.
Samtang mihatag sab ug katin-awan ang Mati LGU nga magpadayon ang pagbakuna sa mga edad 12 anyos pataas ingon man ang mga booster shots sa mga nagkadaiyang vaccination sites sa lalawigan.
Una ng nagpasalamat ang lokal nga kagamhanan gumikan kay daghanan ang mitubag sa ilang panawagan nga pabakunahan sa mga ginikanan ang ilang mga anak dungan sa pagsugod sa roll out niini sa milabay nga semana kini arun nga magbaton sab ug igong proteksiyon sa ilang kaugalingon ang mga nahisgutan batok sa makamatay nga kagaw.
