DAVAO CITY – Nagpahimangno ang Office of the Civil Defense 11 nga mag-igmat ang katawhan sa mga sagunsong pag-uwan nga hatud sa Soutwest Monsoon kon Habagat nga magresulta sa ilabihang pagbaha sa ubang bahin sa rehiyon.
Sumala ni Franz Irag, ang Chief Operations Head sa OCD 11, sa ekslusibong pakighinabi sa Bombo Radyo Davao, nga ilabihang naapektuhan sa mga pagbaha ang mga lugar sa norte nga bahin sa Davao Region partikular na sa Carmen, Kapalong ug Tagum City sa Davao del Norte, ug Maco sa Davao de Oro.
Sumala sa buhatan, anaa sa 2,322 ka mga pamilya gikan sa maong mga lugar ang naapektuhan sa mga pagbaha ning nilabayng weekend apan walay natalang mga nakabsan sa kinabuhi gumikan sa mga pagbaha; gawas na lamang sa magtiayon nga namatay ug duha ka anak nga nasamdan atol sa pagkatumba sa usa ka dagkong punoan sa Davao Oriental gumikan sa kusog nga hangin ug ulan niadtong adlawng Sabado.
Hinuon, nagpadayon ang monitoring sa OCD 11 inubanan sa mga nagkalain-laing Disaster Risk Reduction and Management Office sa rehiyon alang sa ipaabot nga mga hinabang alang sa mga apektadong pamilya.
