DAVAO CITY – Gikabutyag sa BFP Tagum nga usa sa pinakadagkong sunog sa ilahang lungsod ang nahitabong sa usa ka bodega sa Brgy. Magugpo Poblacion, Tagum City, Davao del Norte ning milabayng adlaw.
Sa ekslusibong pakighinabi sa Bombo Radyo Davao kang SFO1 Ryan Joseph Rasay, anaa sa 18 ka mga sunog ang nahitabo sa syudad sulod sa unang siyam ka bulan karong tuiga.
Usa matud pa sa mga dagkong sunog nga nahitabo sa Tagum City pipila ka tuig na ang minglabay, mao ang pagkaugdaw sa usa ka department store nga halos duol lamang sa naugdaw sab nga bodega sa Quirante 1 ug Quirante 2 nga gipanag-iyahan sa NCCC.
Sumala sa opisyal, niabot sa 4th alarm ang pag-ulbo sa dagkong kalayo nga girespondehan sab sa kasikbit nga mga fire stations gikan Maco, Mawab, Sto. Tomas, Panabo, ug Carmen.
Nilungtad og kapin 10 ka oras ang pag-apula sa maong sunog nga nagsugod niadtong Setyembre 24 bandang alas-10:00 sa gabii ug gideklarang fireout bandang alas-10:30 sa buntag, Setyembre 25.
Giimbestigahan pa sa mga kabumberuhan ang maong panghitabo diin usa sa mga ginalantaw ang aspetong elektrikal nga nagpa-combust sa mga kagamitan sulod sa maong bodega.
Hinuon, ilang gipaklaro nga bastante og tao ug ingon man ubang gamit pangresponde ang BFP Tagum.
Nagpahugot na sab sa pagpahimangno ang kabumberuhan sa Tagum City ngadto sa mga Tagumenyo atol sa Ber months pinaagi sa pag-monitor sa mga panindang Chrismas lights ug uban pang dekorasyon sama sa parol.
Lakip na sab sa ginabantayan ang mga panindang pabuto alang sa Bag-ong Tuig diin nakigkoordinar sila sa LGU aron mabantayan ang pagtamud sa mga mga mamaligyaay sa mga safety regulations aron malikayan ang pag-ulbo sa kalayo ug ubang susamang panghitabo.
via || Bombo LJF
