DAVAO CITY – Gi-awhag sa usa ka physician sa usa ka hospital ning dakbayan sa Davao ang lokal nga kagamhanan nga mas maayong mohatag ug pagsalig sa mga hospital ilabi na kung hisgutan ang admission sa mga pasyente inay ang pagmugna sumala pa ug “over-reaching” Executive Order (EO) sama na lamang sa pag-require sa mga nahisgutan nga magdala ug RT-PCR test ayha moadto sa mga hospital.
Sumala pa kang Dr. Jack Estuart, Medical Director sa Brokenshire Hospital sukad 1994 hangtud 2010, ang hospital adunay COVID-19 policies nga gipatuman sa susaman nga mga sitwasyon.
Ang pahayag sa nahisgutan adunay kalabotan sa gi-isyu ni Mayor Sara Duterte nga EO No. 53 nga nagmando ug COVID-19 RT-PCR testing sa mga pasyente nga gina-refer sa mga hospital dinhi sa siyudad.
Ilalom sa EO, tanan nga mga pasyente nga gina-refer sa mga hospital sa dakbayan ang gi-require nga magdala ug RT-PCR test gawas lamang sa Southern Philippine Medical Center (SPMC) kini aron nga ma-protektahan ang panglawas sa mga frontliners.
Kahinumduman nga nakadawat ug daghanang reaksiyon ang bag-ong polisiya kini tungod sa kamahal sa RT-PCR test diin anaa sumala pa sa P6,000 matag usa ilabi na kung sa pribadong institusyon mopailalom niini.
