DAVAO CITY- Nihatag og katin-awan si Police Regional Office (PRO) XI Director PBGen. Nicholas Torre III kalabot sa isyu nga ikatulong hugna sa pag-ilis og opisyal nga molingkod isip director sa Davao City Police Office.
Sa gipahigayong Sanguniang Panglungsod ning dakbayan kagahapon, gikanayon sa opisyal nga ang maong kamandoan ang nagagikan sa Philippine National Police (PNP) og dili ang gikan sa iyaha mismo.
Pagpaklaro pa sa opisyal, siya ang nag rekomenda kay P/Col Lito Patay nga mamahimong Director sa DCPO ug mao usab kini ang gipili ni Davao City Mayor Baste Duterte.
Apan pipila lamang ka oras sa dihang opisyal na kiining molingkod, giilisdan sa Camp Crame ang maong desisyon base na usab sa Section 26 sa Republic Act 6975.
Sumala pa sa opisyal, nagasunod lamang kini sa kamandoan gikan sa taas apan gipasalig niini nga magpadayon ang ilang maayong serbisyo ngadto sa katawhan.
Gawas niini, nihatag usab og pagpaklaro ang opisyal sa kalahian sa Officer in Charge ug Acting Chief kung diin 30 diyas lamang molingkod ang OIC samtang molugway pa og 30 diyas ang pagserbisyo sa naila nga acting chief.
Ning kasamtangan, si PCol. Hansel Marantan ang naglingkod isip acting city director uban ang pasalig nga bisan paman daghan ang nikwestyun sa iyahang kapasidad, magpadayon gihapon kini sa pagpanguna og mga programa nga labing makatabang sa pagpadayon sa kalinaw sa dakbayan.
Kahinumduman nga nangayo og katin-awan gikan sa Police Regional Office (PRO) XI si Councilor Luna Acosta kalabot sa “inconsistency sa pagtuboy og director sa Davao City Police Office (DCPO).
Sumala pa sa konsehal, dili makatarunganon ang maong panghitabo hilabi pa nga wala kini nihatag og katin-awan sa katawhan sa dakbayan
