Gipahayag sa activist group nga Bagong Alyansang Makabayan (BAYAN) kagahapng adlawa nga ilang gilantaw ang posibilidad sa pag-usab sa pag-file og impeachment complaint batok kang Vice President Sara Duterte human matapos ang one-year ban sa Pebrero 5, 2026.
Sumala kang BAYAN chairperson Teddy Casiño, ang plano nagdepende sa desisyon sa Supreme Court sa ilang apela human ideklara sa korte nga unconstitutional ang mga naunang articles of impeachment batok ni VP Duterte sa unang bahin sa tuig.
Gidugang pa ni Casiño nga daghan pang bag-ong kondisyon ang gi-set sa Supreme Court, mao nga mas lisod na ang pag-file og impeachment, apan gipasiguro niini nga aduna gihapoy intensyon ang grupo nga ipadayon kini.
Kahinumduman nga niadtong Disyembre 2024, nagsang-at og reklamo ang BAYAN ug Makabayan bloc og impeachment complaint nga nag-akusar sa Bise Presidente sa paglapas sa public trust pinaagi sa sumala pa sayop nga paggamit sa confidential funds, ug sa paghulga sa pipila ka mga opisyal sa gobyerno.
Apan, mihukom ang Korte Suprema niadtong Hulyo nga milapas ang mga magbabalaod sa one-year ban rule, mao nga mahimo na lamang magpasaka og bag-ong complaint human sa Pebrero 2026. Gibutyag pa ni Casiño nga kung maaprubahan ang ilang apela, ipadayon nila ang impeachment trial sa Senado.
Kung dili, mag-file sila og bag-ong complaint. Wala pa gihapoy desisyon ang grupo kung magsang-at ba usab sila og buwag nga impeachment batok ni Pangulong Ferdinand Marcos Jr.
