DAVAO CITY – Wala pay kamandu-an ang Department of Environment and Natural Resources Office ug ang Protected Area Management Board nga ablihan na sa publiko labi na sa mountaineers ang Mount Apo.
Sumala pa kang DENR Regional Director ug PAMB head Atty. Felex Aleser napadaplin ang proposal nga ablihan ang Mount Apo karong semana santa gumikan kay mibabag ang mga lumad sa Mount Apo.
Ang mga nahisgutan mao ang nanghingusog sa pagpasera sa Mount Apo gumikan kay duna sila’y katungod niini, base sa gi-isyo kanila nga certificate of ancestral domain title.
Dugang sab ni Aleser nga wala sab makosulta ang mga lumad sa plano nga pag-abli sa Mount Apo.
Kahinumduman nga dunay gipagula nga indefinite closeur ang PAMB sa Mount Apo human kini masunog niadtong bulan sa Marso sa milabay nga tuig atol gihapon sa kapanahonan sa semana santa.
Wala pa masayri kung hangtud kanus-a ablihan ang nahisgutan nga bukid ngadto sa mga climbers ug Mountainers.
Una nang mi-apela ang usa ka local government unit sa Mount Apo aron nga kahatagan ug pagtugot aron nga mahinayon ang tinuig nga Boulder Face Challenge nga anaa na karon sa ikasiyam ka tuig.
