DAVAO CITY – Andam na matud pa ang tanang mga tulunghaan sa rehiyon sa Davao alang sa school year 2020-2021 nga mag-abli sa umaabot nga Oktubre 5 ning kasamtangang tuig.
Kini mismo ang gikumpirma sa Department of Education (DepEd XI). Sumala sa tigpamaba sa buhatan nga si Jenielito “Dodong” Atillo, wala napakyas ang pagpangandam sa mga magtutudlo ug sa mga tulonghaan sa rehiyon gumikan kumpleto na ang tanang mga panginahanglanon alang sa pag-abri sa klase sama na lamang sa mga modules nga maoy gamiton sa mga estudyante.
Kahinumduman nga gumikan sa Coronavirus Disease 2019 (COVID-19), anaa na ang tanan sa ginatawag nga new normal aron nga makapadayon gihapon sa mga buluhaton taliwala paman sa pandemyang nasinatian.
Dungan usab sa pagpangandam sa buhatan sa subling pagbalik sa klase, hangyo niini sa katawhan nga makig-cooperate pinaagi sa pagpahibalo kanila kung aduna bay masinatiang mga problema sa bag-ong sistema aron nga mahatagan gilayon kini og pagtagad.
