DAVAO CITY – Andam na karon ang lokal nga kagamhanan alang sa pag-abli sa food terminal complex nga nahimutang sa Toril District ning dakbayan.
Sumala pa kang Leo Brian Leuterio, city agriculturist office chief, anaa na matud pa karun sa final stages ang pag-craft nila ug implementing Rules and Regulations (IRR) alang sa operasyon sa Davao City Food Terminal Complex (DFTC) ug lauman nga matapos na kini sulod karung bulana.
Nakiglambigit na sab sumala pa ang ilang buhatan sa uban nga ahensiya ug mikunsulta na sila sa city legal office arun nga masiguro nga ang IRR ang nahasubay sa balaud.
Nasayran nga ang P17-million DCFTC usa ka component sa Regional Food Terminal Program sa National Food Authority ug Food Terminal Incorporated.
Nagsilbi sab kini isip post-harvest facility alang sa mga mag-uuma nga gamiton sa higayon nga adunay oversupply sa prutas ug gulay atol sa harvest seasons.
Samtang ang Department of Agriculture Davao Region 11 (DA-11) ang mi-alokar ug PHP70 million arun nga pundohan ang pagtukod sa DCFTC sa Daliao, Toril.
Sumala sa DA-11 nga ang katukuran sa DFTC nagtumong nga mapalambo ang farmer-consumer trading market sa dakbayan.
