DAVAO CITY – Padayon karon ang pagsaka sa kaso sa sunog sa Davao region sulod lamang karung 2018 diin natala sa Bureau of Fire Protection (BFP) 11 ang 667 ka mga insidente sa sunog sukad Enero hangtud Agosto ning tuig kasamtangan.
Matud pa kang SFO2 Ramil Gillado, chief investigator sa BFP 11, mas taas sumala pa ang nahisgutan nga ihap kung itandi sa 282 nga kaso sa susamang panahon sa milabay nga tuig.
Nasayran sab sa opisyal nga usa sa mga hinungdan niini ang pagsaka sa kaso sa grass fire nga anaa sumala pa sa 50 porsyento.
Sa nahisgutan usab nga ihap, anaa sa 282 niini ang natalang kaso sa sunog dinhi sa dakbayan sa Davao diin sagad nga hinungdan niini mao ang suliran sa linya sa kuryente.
Gitambagan na lamang karon ang publiko nga kanunay i-check ang linya sa kuryente ug likayan ang mga butang nga sagad tinubdan sa sunog.
