Nagpaabot og pagsalig si MP Promotions CEO Jas Mathur nga magpabilin gihapon nga dakong atraksyon sa mga boxing fans ang giplanong rematch nila Manny Pacquiao ug Floyd Mayweather Jr. bisan pa man nga gibalhin ngadto sa Enero sa sunod tuig ang maong panagsangka. Sumala pa kang Mathur, kombinsido siya nga magmalampuson pag-usab ang ikaduhang panagsangka nila Pacquiao ug Mayweather ug posible kining makabuhat og bag-ong rekord sa kalibotan sa boksing, tungod kay kini usa sa labing gipaabot nga panagsangka nga gusto makita pag-usab sa mga fans.
Dugang pa niini, iyang gibutyag nga ang rematch nila Pacquiao ug Mayweather mahimong usa sa pinakadakong sporting events sa panahon sa streaming era, ilabi na tungod sa dakong ngalan ug impluwensya sa duha ka boksingero sa tibuok kalibotan. Kahinumduman, unang gipahibalo ang maong rematch ning tuiga apan gisukit kini sa pipila ka boxing analysts ug fans kung makabaton pa ba kini sa parehas nga interes nga nakuha sa ilang unang panagsangka niadtong 2015.
Sa maong unang away, midaog si Mayweather pinaagi sa unanimous decision batok kang Pacquiao, apan daghang fans ang napakyas sa ilang gipaabot human giingong kulang sa aksyon ang maong laban tungod sa depensibong estilo sa Amerikanong boksingero. Lakip usab sa gihatagan og pagtagad sa mga kritiko ang edad sa duha ka boksingero, diin hapit na mag-50 anyos si Mayweather samtang 48 anyos na usab si Pacquiao sa panahon nga ipahigayon ang giplanong rematch sa Enero.
Bisan pa niini, nagpabilin ang pagsalig ni Mathur nga dili mahimong babag ang edad sa duha ka boksingero tungod sa ilang talagsaong personalidad, rekord, ug dakong kontribusyon sa kalibotan sa boksing.
