DAVAO CITY – Maghatag ug dagkong ganti ang lokal nga panggamhanan sa Davao del Norte ngadto sa makatudlo sa tugkaran sa mga dagkong drug lords nga nagalihok sa tibuok probinsya.
Gikanayon ni Governor Edwin Jubahib, maghatag ang panggamhanan ug usa ka milyones pesos nga reward alang sa mag-report sa mga namatikdang transaksyon sa ilegal nga droga sa mga otoridad ug sa iyang opisina.
Matud pa sa gobernador atol sa nahitabong pagsunog sa mga nakumpiskang ginadiling droga sa usa ka crematorium sa Brgy. La Filipina, Tagum City niadtong nakalabay nga bulan, dako ang pangandoy sa gobernador nga masumpo na ang problema sa ginadiling droga.
Sanglit, ubay-ubay na ka barangay ang gideklarang drug cleared, samtang adunay duha ka lungsod sa probinsya ang bag-ohay pa lamang gideklarang drug cleared municipality.
Gipunting sab ngadto sa mga nagagamit niini ang posibleng atubangon nga mga sangpotanan sa ilang binuhatan sama sa krimen.
Andam sab nga mutabang ang panggamhanan sa mga biktima sa ginadiling droga alang sa ilang kabag-uhan.
Natigayon sab ang usa ka panagpulong sa Provincial Anti-Drug Abuse Council sa miaging bulan aron pakusgan pa ang kampanya sa probinsya batok ilegal nga droga.
via || Bombo LJ Florendo
