DAVAO CITY – Nasakmit sa Department of Trade and Industry (DTI) ang P8 milyones nga balor sa uncertified ug substandard nga mga tubo ug steel products sa Davao City.
Nasayran nga atol sa nahitabong duha ka adlaw nga enforcement operation, anaa sa 22 ka mga kompanya ang naisyuhan og mga notice of violation, ug gimandoan sa pagpasabot sa sayop nga label o dili maayo nga kondisyon sa ilang mga produkto sulod sa 48 ka oras.
Nasakmit sa task force nga gipangulohan sa Consumer Protection Group ug Fair Trade Enforcement Bureau ang P4.1 milyones nga balor sa itom ug galvanized iron steel pipes nga dunay misleading labels; ug P2.8 milyones nga balor sa deformed steel bars.
Dugang pa, 1,836 ka mga produkto ang na-hold tungod sa wala pagsunod sa Philippine Standard Quality and Safety Mark ug Import Commodity Clearance, lakip ang mga tubo sa tubig.
Gipasiugda ni Trade and Industry Secretary Alfredo Pascual ang nahitabong pagsakmit isip pasidaan batok sa mga malapason sa fair trade and industry laws.
Nagpahinumdum si DTI Undersecretary Ruth Castelo sa mga tigbaligya sa pagtuman sa mandatory product certification requirements, ug nag-awhag sa mga konsumidor nga susihon ang PS mark o ICC sticker sa dili pa mopalit aron masiguro ang kalidad sa produkto.
via || Bombo LJF
