DAVAO CITY – Nadiskobreahan karon sa Bureau of Customs (BOC) ang P7.4 million nga kantidad sa mga mahalon nga sakyanan ug uban pang kontrabando sulod sa unom ka mga container vans nga gipahimutang sa pribado nga pantalan sa Panabo City, Davao del Norte.
Ang pag-abli sa nahisgutan nga container van gipangunahan ni Customs Commissioner Nicanor Faeldon nga nahimutang sa Davao International Container Terminal (DICT) sa Panabo diin narekober ang mga smuggled onions nga kantidad sa P2.245 million, lumber nga kantidad sa P3.4 million, ug usa ka Mercedes Benz nga mobalor sa P1.888 million.
Samtang padayon pa sab karon nga gidetermina ang kantidad sa mga smuggled nga lubi ug wood pallets. Gikanayon nga ang mga wood pallets, lumbers, ug mga lubi ang dad-on unta paingon sa China samtang ang mahalon nga sakyanan ang dad-on sa Belgium samtang ang sibuyas ibiyahe paingon sa India.
Pinaagi sumala pa sa gipahugtan nga intelligence gathering, nasubay sa ahensiya ang nahisgutan nga kontrabando.
Gikanayong ang tanan nga mga container Van walay import clearance ug undeclared.
Sa kasamtangan, nagpadayon ang BOC sa pagmonitor sa mga pantalan sa Davao Region aron nga masiguro nga walay kontrabando nga makasulod sa rehiyon.
Gipahimangnoan sab sa BOC ang mga exporters nga motamud ingon man mag-operate ilalom sa balaud pinaagi sa pagbayad ug ensakto nga buhis sa gobyerno.
