Gipirmahan na ni Presidente Ferdinand ”Bongbong” Marcos Jr. karong adlawa ang gisugyot nga nasudnong budget alang sa fiscal year 2026 human sa usa ka semana nga pagsusi sa tanang alokasyon ug probisyon niini.
Ang pagpirma sa P6.793-trilyon nga pondo alang karong tuiga, gihimo sa Ceremonial Hall sa Malacañang Palace, nga gitambongan sa mga importanteng opisyal sa gobyerno, mga senador, ug mga kongresista.
Gibutyag ni Executive Secretary Ralph Recto nga ang Executive Branch mosiguro nga ang 2026 General Appropriations Act dili lamang makatagbaw sa legal ug teknikal nga mga kinahanglanon, apan sa mga panginahanglan usab sa katawhang Pilipino.
Nasayran nga sa mubo nga panahon, ang gobyerno naglihok ubos sa usa ka reenacted budget tungod kay niadtong Disyembre 29, 2025 lamang nadawat sa Executive Branch ang gi-ratipika nga nasudnong pondo gikan sa Kongreso.
Samtang sa laing bahin gibutyag ni Pang. Ferdinand Marcos Jr. nga iyang gi-veto ang P92.5 bilyon o 38 porsiyento sa P243.4 bilyon nga unprogrammed appropriations sa 2026 General Appropriations Act (GAA), hinungdan nga gipakunhod kini sa labing-ubos nga lebel nga kinahanglan gayud sa nasud.
Tungod niini, ang unprogrammed appropriations sa 2026 national budget giputol ngadto sa P150.9 bilyon, nga mas ubos kaayo kung itandi sa P531.67 bilyon niadtong 2025.
Sumala kang Pangulong Marcos, kini na ang labing ubos nga kantidad sa unprogrammed appropriations sukad pa niadtong 2019.
