Mokabat sa P5 milyon ang kantidad sa mga nakumpiska nga Marijuana nga nadiskubrihan sa PDEA-11 ug NBI-11 sulod sa bodega sa courier company sa Bunawan, ning syudad sa Dabaw.
Subay sa report sa mga ototridad, adunay 11 ka mga parcel ang ilahang gisusi subay sa sumbong nga ilahang nadawat nga adunay unod nga iligal nga droga.
Sa gihimong pagsusi niini uban ag K9 unit, nasuta nga ang unom ka mga parcel ang adunay sulod nga high grade marijuana kush, marijuana oil ug vape nga adunay substance sa marijuana.
Sumala pa sa mga ototridad nga subay sa nakabutang nga address sa parcel, gikan kini sa laing nasud ug padulong kini sa Luzon ug i-deliver sa mga lugar sa Maguindanao, Cotabato City, Davao Oriental, Davao del Norte ug dinhi sa dakbayan sa Dabaw.
Gidala na sa PDEA laboratory ang mga nasakmit nga marijuana alang sa tukmang disposition.
Samtang padayon karon ang imbistigasyon aron masuta kung kinsa ang nagpadala ug si kinsa ang padalhan sa mga parcel.
