Gikompirma ni Brigadier General Arsenio Sadural, Brigade Commander sa 901st Infantry Brigade Philippine Army, nga kapin sa 5 milyon pesos ang patong sa ulo sa namatay nga si Myrna Sularte kon Ka Maria Malaya.
Apan, giklaro sa opisyal nga wala pa niini natumbok sa mamahimo nga makadawat sa maong reward money gumikan nakatutok pa ang militar sa nagpadayon nga military operation batok sa misibat nga kaubanan ni Ka Maria Malaya.
Sumala pa ni Sadural, aduna pay gibana-banaan nga 40 ka rebelde nga kaubanan niini ang padayon nga ginagukod kansa mas ubos sa namonitor niini nga 120 ka mga rebelde kaniadtong Nobyembre 2023.
Apan, gipaklaro sa opisyal nga gusto sa militar nga ma-neutralize ang mga rebelde pinaagi sa pagsurrender ug dili sa kamatayon rason nga padayon nanawagan ang militar sa mga rebelde nga mubalik na sa sabakan sa balaod aron makapahimulos sa nindot nga programa sa gobyerno nga ang Enhanced Local Integration Program kon E-CLIP.
Una nga gipadayag sa opisyal nga dakong kawad-on ang kamatayon ni Ka Maria Malaya sa iyang grupo diin wala pa niini namonitor kung kinsa ang mohulip sa iyang gihawiran nga katungdanan isip secretary sa komunistang grupo nga Northeastern Mindanao Regional Committee (NEMRC) nga miyembro usab sa Political Bureau sa Communist Party of the Philippines.
Nasayran nga natawo si Ka Maria Malaya sa Purok-4, Barangay Salvacion, Bayugan City, lalawigan sa Agusan del Sur ug misulod kini sa walhong kalihukan human nakagradwar sa kursong Bachelor of Science in Agricultural Technology kaniadtong tuig 1997 ug 1999, dayun nga nahimo kini nga secretary sa Northeastern Mindanao Regional Committee.
