Nakumpiska sa Naval Forces Eastern Mindanao (NFEM) ang mga kontrabando nga nagkantidad og kapin ₱44,000,000 nga mga undocumented nga sigarilyo atol sa ilahang maritime patrol sa baybayon sa Pantukan, Davao de Oro.
Sumala sa report sa NFEM, 13 ka mga Pilipinong tripulante ang sakay sa motorboat nga gikan sa Jolo, Sulu, ug giangkong nagdala sa mga kargamento nga naglangkob sa 1,118 ka kahon sa ilegal nga sigarilyo, nga gituyo unta nga ipang-apod-apod sa mga kasikbit nga mga lugar dinhi sa rehiyon.
Human sa inspeksyon, gi-ubanan gilayon ang motorboat padulong sa Naval Station Felix Apolinario sa Davao City alang sa dugang nga mga proseso.
Ang mga kontrabando, lakip na ang motorboat, pormal nga gi-turnover sa Bureau of Internal Revenue (BIR) alang sa hustong imbestigasyon ug legal nga aksyon.
Ang mga 13 ka mga dinakpan nga tripulante nag-atubang og kasong paglapas sa Republic Act No. 10863, mas nailhan nga Customs Modernization and Tariff Act of 2016, nga nagtumong sa pagpugong sa smuggling ug mga illegal nga aktibidad sa nasud.
Sa karon padayon usab ang gihimong imbistigasyon sa mga otoridad.
