DAVAO CITY – Mikabat ngadto sa 13 ka mga kabalayan ang nangasunog ug 9 niini ang nanga-ugdaw diin P340 mil ang gikatalang danyos sa sunog alas 2:30 sa hapon kagahapon hangtud sa alas 5:50 kagahapon sa Barangay 8-A Father Selga, Bankerohan, boundary sa Barangay 5-A ug 8-A, ning dakbayan sa Davao.
Si Welswer Mangubat, 17 anyos, Grade 9 na-injured human mapaso ang tuo nga kamot, ug nakahi-agum ug second degree burn human baliki ang iyang amahan ug igsoon gumikan kay nagdilaab na ang ilang balay nga ikaduha gikan sa balay nga tinubdan sa sunog.
Sumala sab kang Welmer Mangubat, Sr., amahan ni Welswer nga ugdaw gyud ang ilang balay ug wala’y nasalbar nga mga gamit bisan ang uniform sa iyang anak gumikan kay gilibotan na sila ug kalayo.
Gumikan kay naugdaw tanan ang ilang mga balay ug gamit nagsalig lamang una ang mga biktima sa ihatag nga hinabang sa kagamhanan ug sa mga nagpakabana nga mga lungsuranon.
Gitataw ni Welmer nga titulado ang yuta nga gitukuran sa ilang balay mao nga kung mo-abot ang tabang sa kagamhanan hinay-hinayan gihapon nila sa pagtukod ang ilang balay sa dapit.
