Nagduso si Leyte Rep. Ferdinand Martin Romualdez og House Bill No. 7663 nga nagtumong sa paghatag og P3,000 nga binuwan nga pensyon ug social protection package alang sa mga kwalipikadong edaran, adunay kabilinggan, ug kabus nga mga mag-uuma nga dili sakop sa SSS, GSIS, o pribadong retirement system.
Sumala ni Romualdez, importante ang paghatag og pensyon aron mahatagan og pinansyal nga kasiguruhan ang mga mag-uuma nga kasagaran adunay ubos ug dili sigurado nga kita, ug mapugos sa pagtrabaho lapas sa edad sa pagretiro.
Matod pa niya, ang regular nga pensyon makatabang sa pagpakunhod sa ilang pagsalig sa pamilya ug malikayan ang pagpamaligya sa ilahang kabtangan alang sa adlaw-adlaw nga gastuhan. Ang maong sugyot nga gitawag og “Comprehensive Farmers’ Pension and Social Protection Act” gitakda usab ni Tingog Party-list Rep. Jude Acidre.
Ubos sa sa maong sugyot, ang mga kwalipikadong benepisyaryo naglakip sa mosunod: Mga mag-uuma nga 60-anyos pataas nga walay nadawat nga pensyon; Mga mag-uuma nga adunay medikal nga sertipikadong kabilinggan; Mga indigent nga mag-uuma nga giila sa ilahang tagsa-tagsa ka LGU sumala sa Community-Based Monitoring System Act.
Gilatid usab sa maong sugyot ang paghatag og P50,000 nga basic life insurance ug hangtod P25,000 nga accident ug disability assistance matag claim.
Ang Department of Agriculture, kauban ang Department of Social Welfare and Development ug Philippine Crop Insurance Corp., maoy mangulo sa implementasyon sa programa. Ang pondo alang niini isulod sa tinuig nga budget sa DA ug DSWD.
