Makadawat og P2 milyon nga ganti ang bisan kinsa nga makahatag og impormasyon mahitungod sa mga suspetsado ug mastermind sa pagpatay kang Barangay Captain Oscar “Dodong” Bucol Jr. sa Tres de Mayo, Digos City.
Gipasabot ni Atty. Israelito Torreon, legal counsel ni Vice President Sara Duterte, nga magpahatag ang Bise Presidente og P1 milyon nga ganti aron matumbok ang mga responsable sa krimen.
Samtang, maghatag usab og P1 milyon si Davao del Sur Governor Yvonne Cagas P500,000 alang sa makadakop sa gunman, ug P500,000 alang sa makahatag og impormasyon sa mastermind.
Gipailalom na sa paraffin test ang pipila ka person of interest, lakip na ang usa nga ginganlan sa biktima sa wala pa kini mamatay, si PLtCol. Peter Glenn D. Ipong.
kapin sa 21 ka mga personnel usab ang gi-relieve sa ilang pwesto aron masiguro nga dili maapektuhan ang nagpadayong imbestigasyon.
Ginasuta sa mga imbestigador ang pipila ka posible nga motibo sa pagpatay: personal nga away, pulitika, sugal, ug negosyo.
Padayon usab ang pag-review sa CCTV aron masuta ang posibleng entry ug exit route sa sakyanan sa mga suspek.
Sa opisyal nga pahayag sa LGU, gidayeg si Kapitan Bucol dili lang isip lider sa barangay apan haligi sa komunidad, higala, ug tinuoray nga public servant nga matinud-anong nanerbisyo sa iyang mga katawhan.
Giklaro sa LGU ang insidente nga usa ka dakong trahedya alang sa Barangay Tres de Mayo ug ilang gihangyo ang kompleto, patas, ug paspas nga imbestigasyon gikan sa mga awtoridad.
Gikabutyag pa niini nga “Miuli na si Dodong, apan ang iyang kabahin alang sa komunidad magpabilin sa among mga kasingkasing.”
Kagabii, gihaya na sa covered court ang patay’ng lawas sa kapitan ug daghang katawhan ang miadtò aron nga mosud-ong sa namatay nga kapitan.
Padayon usab nga gisinggit sa iyang pamilya ug mga supporters ang pagpanawagan og hustisya alang sa iyang kamatayon.
Una na usab nga gikumpirma sa Davao del Sur Provincial Police Office (DavSur PPO) nga magmugna sila og Special Investigation Task Group (SITG) aron motutok sa imbestigasyon.
