Mokabat sa 2.5 milyon ang kantidad sa nakumpiska nga palusot nga sigarilyo sa mga kapulisan sulod sa Prime Mover Truck kagabii.
Subay sa report sa Baliok PNP, samtang nagpahigayon sila og checkpoint pasado alas Otso kagabii sa Libby Road, Barangay Bago Gallera sa siyudad sa Davao ilahang nababagan ang usa ka Prime Mover Truck nga adunay karga nga kinarton mga sigarilyo.
Nasayran nga gimaneho ang nasampit nga sakyanan sa usa ka alyas Merwin, nga residente sa Zamboanga City. Sumala pa sa mga otoridad, walay gikapakitang dokumento ang nahisgutan sa mga karga nga sigarilyo og kini gideklara sa mga otoridad nga palusot.
Nakumpiska sa mga otoridad 200 ka mga kinarton sa usa ka brand sa sigarilyo. Sumala pa sa mga kapulisan nga una ng namatikdan ang truck nga adunay mga ream sa sigarilyo sa atubangan nga bahin nga miresulta sa pagkadiskubre sa mga karga usab niini. Sa pagkakaron, ang dinakpan ang anaa na sa kostudiya sa kapulisan og pasakahan kini og kasong pagsupak sa Tariff and Customs Code of the Philippines ug R.A. 10643.
Samtang ginasubay na usab karong panahuna ang tag-iya sa nasampit nga kontrabando.
