Makunsederang criminal negligence ang kapakyasan sa Department of Education (DepEd) ubos sa pagdumala ni Vice President Sara Duterte nga gamiton ang mukabat sa P2.08 bilyong pondo ubos sa 2023 Disaster Risk Reduction and Management (DRRM), gumikan kay mipaduol kini sa katalagman sa mga estudyante. Kini ang giluwatang pamahayag ni House Assistant Majority Leaders Paolo Ortega and Jay Khonghun.
Sa panahon sa pagdumala ni VP Duterte sa DepEd niadtong nakalabay nga tuig, migahin ang kongreso ug P2.14 bilyon alang sa Disaster Preparedness and Response Program (DPRP) ug P2 billion alang sa Quick Response Fund (QRF) o kinatibuk-ang P4.14 billion.
Ang nahisgutang kantidad ang gawas pa sa P2.24 billion DRRM Funds nga wala nagamit sukad sa nakalabayng mga tuig.
Gipahayag pa sa mga magbabalaod nga napakyas ang DepEd nga gamiton ang nahisgutang mga pondo aron seguruhon nga adunay insaktong pasilidad ang mga pampublikong tulunghaan ug aron malimitahan ang epekto sa kalamidad ug hulga sa panglawas sa mga estudyante, magtutudlo ug school support staff.
Sa gipagawas nga report sa COA, gihisgutan niini nga sa Region 11, ubos sa Schools Division Office (SDO) nga ang Island Garden City of Samal ang adunay nakitang mga liki sa mga classrooms ug mga building sa tulunghaan nga gigamit pa gihapon.
Partikular na niini ang paaralang elementarya sa Libertad, Guilon ug Cogon.
Samtang sa San Jose National High School nga anaa sa susamang SDO pa gihapon, wala nagamit ang TLS gumikan kay wala pa nabalhin ang linya sa kuryente hinungdan nga bisan paman makuyaw, padayong gigamit sa mga estudyante ang karaang building.
Nakabutang sa DepEd Department Order No. 024 series of 2021, gamiton ang mga TLS aron malikayan ang pagkalangan sa mga klase sa panahon sa kalamidad o emergency samtang mihatag ug luwas nga mga pasilidad sa pagtungha.
Nagpasidaan ang mga auditor nga gumikan sa hinay nga pagplano ug dili insaktong pagdumala sa mga pondo aron makumpleto ang TLS kun temporary learning space, napugos ang mga estudyante sa pagamit sa dili luwas nga classrooms nga mamahimong muresulta sa dugang mga biktima kung subling makabaton ug kusog nga linog.
Matod pa sa report sa DepEd niadtong 2023 nga gipagawas sa COA, ang DepEd regional offices sa Central Luzon, Eastern Visayas ug Caraga ang adunay wala nagamit nga pondo gikan sa DRRM funds.
Napakyas usab ang DepEd Regional Office 8 nga mosunod sa gikinahanglang pag-apod apod sa DRRM fund nga 70% alang sa disaster preparedness ug 30% sa QRF.
