DAVAO REGION- Gipadayon sa Department of Social Welfare and Development (DSWD)-Davao Region ang paghatod og ayuda ngadto sa mga pamilya nga naapektuhan sa Intertropical Convergence Zone (ITCZ) sa rehiyon, diin kapin sa P12 milyones nga kantidad sa food ug non-food items ang ilang natunol gikan sa Enero 2, 2025.
Gibutyag ni Rachel M. Guerrero, Section Head sa DSWD-Davao, nga ang mga pamilya nga natagaan og tabang gikan sa mga probinsya sa Davao Occidental ug Davao Oriental, sumala sa datos nga nakalap gikan sa municipal ug provincial disaster risk reduction and management offices.
Sukad sa pag-monitor, adunay 24,780 ka pamilya ang nadokumentong naapektuhan sa ITCZ sa rehiyon.
Ang mga ayuda naglakip og food packs nga adunay bugas, delata, ug sachet drinks, samtang ang mga non-food items naglangkob sa hygiene kits, family kits, kitchen kits, sleeping kits, ug modular tents.
Ang maong mga tabang giapod-apod ngadto sa mga pamilya nga adunay mga balay nga partially o totally damaged tungod sa katalagman.
Gipasabot usab sa DSWD-Davao nga ila pang gipadayon ang pag-monitor sa kahimtang sa mga naapektuhan sa ITCZ, ilabi na kay nagpadayon pa ang ting-ulan sa rehiyon.
Gihangyo nila ang publiko nga magmabinantayon, mag-andam sa mga “go bags,” ug magtudlo sa mga kabataan sa mga pamaagi sa pagresponde panahon sa natural nga katalagman.
Ang Davao Occidental ug Davao Oriental mao ang labing apektadong probinsya nga nakasinati og mga pagbaha ug landslide tungod sa kusog nga ulan dala sa ITCZ.
Sa Davao Occidental, ang mga munisipalidad sa Don Marcelino ug Malita nagdeklara na og state of calamity tungod sa grabe nga kadaut sa ilang lugar.
Sumala sa Office of the Civil Defense-Davao Region (OCD-Davao), hangtod alas 10 sa gabii niadtong Enero 1, 2025, kapin sa 16,272 ka pamilya sa Davao Occidental ang natala, samtang 8,464 ka pamilya sa Davao de Oro, ug 44 ka pamilya sa Davao Oriental ang naapektuhan.
Narekord usab nga upat ka kalsada ug tulo ka tulay sa Davao Occidental ang dili maagian tungod sa kadaut, samtang 690 ka balay ang partially damaged ug 383 ka balay ang totally damaged.
Ang mga danyos sa imprastraktura sa Davao Occidental ug Davao del Norte gibanabana nga mokabat og P215.7 milyon.
Gumikan niini, padayon ang DSWD-Davao sa paghatod og mga hinabang ug pagpaniguro nga masulbad dayon ang mga panginahanglanon sa mga naapektuhan sa ITCZ.
