DAVAO CITY – Nagpadayon pa gihapon hangtud karon ang assessment sa City Engineers Office sa kinatibuk-ang kantidad nga nadamyos sa mga infrastracture project sa dakbayan sa Dabaw gumikan sa paglapdos sa bagyong Vinta niadtong milabay nga bulan.
Gikanayon ni Engr. Minerva Taculin sa City Engineers office sa dakbayan sa dabaw, subay sa initial assessment sa ilang buhatan duha ka adlaw human ang pagbaha mi-abot na sa kapin 115 million pesos ang damyos gumikan sa mga nanga-gubang hanging bridge, kalsada, drainage ug uban pa.
Gilauman sumala pa nila nga mosaka pa ang nahisgutang kantidad sanglit hangtud karon nagpadayon ang ilang assessment ilabi na sa mga hilit nga dapit sa syudad.
Sa karon, nagpadayon pa gihapon ang clearing operation sa pipila ka mga barangay sa syudad nga gi-baha sanglit nagpabilin pa ang sobra ka baga sa lapok sa mga kadalanan ug kabalayan partikular na sa Jade valley, S.I.R., ug Bucana ning syudad.
Bisan ug taud-taud nang nasinatian ang bagyong Vinta, apan nagpabilin lamang gihapon sa Jolliville Gym ang 89 ka mga pamilya nga apektado sa pag-baha kansa mga pinoy-anan nangaguba.
Nakahimo na usab sumala pa sa paghatag ang City Social Services and Development Office (CSSDO) ug dul-an 28 milyones ka pesos ngadto sa mga apektadong pamilya gikan sa 50 ka mga barangay sa dakbayan sa Dabaw.
