Nagpatuman karong adlawa ang mga kompanya sa liquefied petroleum gas (LPG) og pagkunhod sa presyo.
Adunay P1.00 kada kilo nga pag-ubos sa presyo nga gisugdan kaganihang buntag, nga nagpasabot nga P11.00 ang giubos sa matag 11-kg nga tangke sa LPG.
Samtang bag-uhay lamang usab nga nagpahigayon og rollback ang mga LPG companies niadtong Hunyo. Samtang, dungan usab ang mga kompanya sa lana sa pagpahigayon og pagkunhod sa presyo kaganihang buntag.
Gisugdan alas-6 sa buntag ang P1.40 kada litro nga pag-ubos sa presyo sa gasolina, P1.80 kada litro sa diesel, ug P2.20 kada litro sa kerosene.
Usa sa mga rason nga nakita sa Department of Energy (DOE) mao ang paghupay sa kagubot tali sa Israel ug Iran, nga nakaapekto sa presyo sa lana sa kalibotan.
Gilauman usab nga adunay sunod nga rollback sa presyo sa mga produktong petrolyo sa umaabot nga semana.
