Gipasabot karon sa Land Transportation Franchising and Regulatory Board (LTFRB) nga wala pa’y mahitabong pagsaka sa plete sa pampasaherong jeep ug bus.
Sumala sa LTFRB, ilang gipahunong sa pagkakaron ang plano nga pagtaas sa pamasahe samtang naghulat pa sila sa ebalwasyon sa epekto niini sa ekonomiya gikan sa National Economic and Development Authority (NEDA).
Gipasabot ni LTFRB Chairperson Atty. Teofilo Guadiz III nga ang taas-pasahe kinahanglan balansehon tali sa interes sa mga operators sa pampublikong transportasyon ug sa kahimtang sa mga pasahero.
Magpagula lang ang LTFRB og update kung adunay opisyal nga resulta sa pagtuon nga ipagula sa NEDA.
Una nang giingon sa LTFRB nga posibleng ipatuman ang P1 nga dugang pasahe sa mga pampasaherong jeep sa sunod semana tungod sa padayon nga pagsaka sa presyo sa lana.
