Giaprobahan sa Department of Budget and Management (DBM) ang P1.684 billion nga pondo alang sa replenishment sa Quick Response Funds (QRF) sa Department of Agriculture (DA), Department of Social Welfare and Development (DSWD), ug Philippine Coast Guard (PCG) aron mapadali ang pagtubag sa mga kalamidad.
Sumala sa DBM, P1 billion ang gi-allocate sa DA alang sa mga rehabilitation program sa mga rehiyon nga gikuso-kuso sa bagyo ug isip standby fund alang sa mga mag-uuma ug mananagat nga maapektuhan sa sunod nga mga kalamidad.
Gibutyag ni DBM Secretary Amenah Pangandaman nga ang mga bagyo grabe kaayo og epekto sa sektor sa agrikultura, busa dali niining gi-aprobahan ang hangyo sa DA nga pun-on pag-usab ang QRF.
Samtang, P631 million ang gi-allocate sa DBM alang sa DSWD, nga gamiton sa pagpalit sa family food packs, non-food items, ug emergency cash transfers sa mga pamilya nga apektado sa kalamidad, nga gilauman makatabang sa dul-an 59,000 ka pamilya.
Gidugang pa sa opisyal nga niadtong Oktubre nagpagawas na usab ang DBM og P1.982 billion alang sa QRF sa DSWD.
Nakakuha usab ang Philippine Coast Guard og P53 million alang sa ilahang relief, rehabilitation, ug search-and-rescue operations sa mga apektadong lugar.
Sumala sa mga awtoridad, duha ang namatay ug duha ang nasamdan, bisan pa man nga padayon pa ang beripikasyon sa mga local disaster offices.
Kahinumduman nga sa niaging semana, gidiklara ni Pangulo Ferdinand Marcos Jr. ang usa ka tuig nga state of national calamity human sa pag-igo sa Typhoon Tino sa Visayas.
