Gipasakahan na ug kaso sa mga otoridad ang suspek nga si alyas Chang, usa ka negosyante, single nga residente sa Sandawa, Brgy.76-A ning dakbayan sa Davao.
Kasong pagsupak sa RA 9165 ang gipasaka sa mga kapulisan sa piskalya sa Ecoland ning syudad sa Davao.
Nadakpan ang nahisgutan sa gikasang operasyon sa Mandug Police Station–Special Drug Enforcement Unit ubos sa direktang pagdumala ni Maj. Rejie Gucor Torrita, uban sa Philippine Drug Enforcement Agency (PDEA) Region XI.
Subay sa imbestigasyon, usa ka medium-sized nga heat-sealed nga transparent plastic sachet nga gituohang shabu, ang gibaligya sa mga otoridad gikan sa suspek.
Mitimbang kini og gibana-banang lima ka gramo, nga nagkantidad og P34,000.
Ang transaksyon naglakip sa P15,500 nga marked money.Sa follow-up nga pagkapkap ngadto sa suspek, nakumpiska pa ang unom ka medium-sized sachet nga gituohang shabu, nga adunay gibug-aton nga 30 gramos ug kantidad nga P204,000.
Nakit-an usab ang duha ka large-sized sachets nga adunay gibug-aton nga 140 gramos, nga nagkantidad og P952,000.
Dugang pa sa mga otoridad, nasakmit usab sa mga operatiba ang 17 ka tabletas nga gituohang party drugs nga adunay tulo ka lain-laing kolor,napulo ka blue, upat ka pink, ug tulo ka black nga adunay estimated street value nga P25,500.
Lakip usab sa nakumpiska mao ang usa ka iPhone 13, ang marked money, P2,600 nga personal cash, ug usa ka itom nga sling bag nga gisudlan sa mga ebidensya.
Nasayran nga ang kinatibuk-ang kantidad sa nakumpiska nga ilegal nga droga, lakip na ang shabu ug party drugs, nagkantidad og P1,215,500.
Sa kasamtangan si Chang ang gibalhog sa selda sa Mandug Police Station.
