Narekober sa pito ka mga mananagat ang upat ka sako nga adunay sulod nga gituohang shabu sa baybayon sa Agno, Pangasinan kagahapong adlawa.
Sumala sa inisyal nga impormasyon, kasamtangang gipailawom na sa imbentaryo sa PDEA Pangasinan ang nadiskubreng shabu nga naglutaw sa dagat.
Makita sa litrato nga ang mga nakuhang kontrabando adunay markings nga Chinese character nga nag-ingon og “freeze-dried durian.”
Gibanabanang 60 ka pakete ang sulod sa upat ka sako nga adunay gibug-aton nga usa ka kilo kada usa ka pakete.
Sa pagkakaron padayon ang koordinasyon sa mga coastal barangay ug sa mga mananagat sa Philippine Drug Enforcement Agency (PDEA) sa lalawigan sa Pangasinan human sa pagkarekober sa pito pa ka sako nga nakita nga naglutaw-lutaw sa kadagatan sa kasadpang bahin sa Pangasinan.
Ang maong mga sako nga nakita sa mga mananagat adunay sulod nga shabu nga gibanabanaan nga nagkantidad og P1.17 bilyon ka pesos.
Sumala ni Police Captain Rowell C. Isit, hepe sa PNP Drug Enforcement Group sa lalawigan, uban nila ang PDEA, Philippine Navy, ug uban pang ahensiya sa gobyerno sa pagrekober sa ilegal nga droga.
Matod sa hepe usab sa maong buhatan, malampuson ang paningkamot sa kapulisan, PDEA, PH Navy, ug ubang yunit sa gobyerno sa pagkuha sa maong ilegal nga droga.
Tungod niini, gi-alerto na nila ang kapulisan sa mga coastal municipalities sa Pangasinan nga palig-unon pa gayud ang pagbantay human sa paglutaw sa pipila ka sako sa droga sa ubang mga dapit sama sa Bolinao ug Agno.
