DAVAO CITY – Gipasalig sa ahensiya sa Overseas Workers Welfare Administration (OWWA)-11 nga pagtugpa pa lang sa eroplano diin sakay ang mga Overseas Filipino Workers (OFWs) nga gikan sa Abroad, hugtanon na nila kini nga gimonitor hangtud nga maabot ang mga nahisgutan sa mga accommodation hotel diin temporaryo nga i-isolate ang mga nahisgutan ayha papauli-on sa ilang tagsa-tagsa ka mga lugar.
Tipik lamang kini aron masiguro nga mahitabo dinhi sa dakbayan ang gidangatan sa usa ka hotel sa Makati diin nakahimo pag-ikyas ang usa ka babaye nga gi-isolate nga nag-positibo sa covid-19 ug nakatakod pa sa pipila ka mga indibidwal human nga miadto sa Party.
Nasayran nga pipila sa mga Returning Overseas Filipinos (ROFs) ang naka-quarantine karon sa mga hotel nga nahimutang sa Lanang ug Quimpo boulevard ning dakbayan.
Sumala sa pamunoan sa nahisgutang mga hotel, hugtanon ang ilang gihimong pagbantay sa mga ROFs ug gani adunay gitahasan nga mga personahe aron nga mo-check sa temperatura sa mga nahisgutan gawas pa sa gi-deploy nga mga personahe sa Davao City Police Office (DCPO).
Pipila sab sa mga establisyemento sa siyudad nga gihimong accommodation sa mga ROFs ang gilangkuban sa Red planet; Pinnacle hotel; Green Windows; World Palace ug Casa Letecia.
Mikabat na karun sa 12,174 ka mga OFWs ingon man Non-OFWs ang natala karun sa OWWA-11 nga miabot dinhi sa siyudad sukad Hunyo 2021 hangtud na sa Enero 5, 2022.
Bisan nga giwagtang na karon sa lokal nga kagamhanan ang pagpangayo ug negative RT-PCR test sa mga pasahero, hugtanon pa gihapon ang gihimo nga mga lakang aron lamang masiguro nga dili makasulod sa dakbayan ang kaso sa Omicron nga mas makatakod nga variant sa covid-19.
