DAVAO CITY – Gikompirma ni Oversea Workers Welfare Administration (OWWA) Eleven Director Eduardo Bellido nga duna sila’y nakuha nga inisyal nga impormasyon kalabot sa mga Overseas Filipino Workers (OFW) nga tipik sa 150 ka mga OFW nga gikuyog ni Pangulong Rodrigo Duterte sa biyahe pabalik sa nasod human makadawat ug pasaylo sa mga kasal-anan nga ilang gi-atubang sa Kingdom of Saudi Arabia.
Gitataw ni Bellido nga ang nahisgutan nga mga OFW dili mga taga-Davao Region apan nakabana lamang ug mga taga-dinhi sa rehiyon.
Nasayran nga gikan sa Abril 11 hangtud kaganinang kaadlawon duna na’y 331 ka mga OFW nga nakauli sa nasod human gipahimuslan ang nueventa ka adlaw nga amnesty period alang sa mga OFW nga nagkaproblema sa ilang panarbaho sa Saudi.
Ang nahisgutan nga mga OFW nakadawat ug singko mil ka pesos nga financial assistance gikan sa OWWA ug sa buhatan mismo ni Pangulong Rodrigo Duterte.
Gawas sa dies mil ka pesos nga financial assistance, duna sab sila’y mapahimuslan nga mga livelihood program. Makapahimulos niini ang mga sakop ug dili sakop sa OWWA.
Sumala pa kang Bellido nga kalakip lamang ang mga Filipino ug uban pa nga mga langyaw nga mga mamumuo nga makapahimulos sa amnesty nga matag tuig nga ginahatag sa kagamhanan sa Saudi Arabia.
Kung mohupas na ang nueventa ka adlaw nga amnesty period mamahimo na nga normal ang proseso ug makahi-agum sa dagku nga mga multa ang mga langyaw nga mga mamumuo nga hupas na ang mga gihoptan nga mga dokumento.
