DAVAO CITY – Padayon nga nakatala karon ang otoridad ug mga indibidwal nga wala nakasulod sa siyudad gumikan kay walay igong dala nga rekisitos o dili mahinungdanon ang ilang lakaw.
Kahinumduman nga gipatuman karon ang pagkontrola sa mga utlanan sa Davao region kini aron malikayan sab nga makasulod ang mga bag-ong variant sa covid-19.
Kahinumduman nga kadtong gikan sa gawas sa Davao region, kinahanglan nga magdala ug negative results sa RT-PCR test ug angayan nga mahinungdanon lamang ang tuyo niini.
Partikular nga gibantayan karon ang boarder control checkpoint sa Lumondao Marilog District diin sa kasamtangan, mikabat na matud pa sa 2,118 ang wala gitugutan nga makasulod diin gilangkuban kini sa 481 ka mga sakyanan ug 50 ka mga motorsiklo.
Aduna sab sumala pay mga indibidwal nga wala gitugutan nga mga makagawas sa utlanan gumikan kay dili essential ang lakaw diin sukad Hunyo 5 hangtud na sa Hulyo 14, mikabat na sa 571 ang natala nga gilangkuban sa 112 ka mga sakyanan, 56 ka mga motorsiklo ug unom ka mga naga-bisikleta.
Padayon ang pahimangno karon sa otoridad nga motamud sa mga health protocols sanglit nagpabilin pa gihapon ang bahad sa covid-19 ug taas sab ang kaso niini sa pipila ka bahin sa Davao region.
