DAVAO CITY – Gipapalapdan pa sa Southern Philippines Medical Center ang pagpanghatag og kaalam mahitungod sa organ donation pinaagi sa usa ka training course seminar nga gisalmutan sa gatusan ka mga kawani sa mga nagkandaiyang opisina sa Davao City LGU.
Gikanayon ni Dr. Maria Theresa Bad-ang, ang head sa organ procurement organization sa DOH Davao, nga mas labing maayong pagpanamabal ang organ transplant kon itandi sa pagpa-dialysis.
Mas malugwayan pa ang kinabuhi sa tawo og 90% sulod sa lima ka tuig kon itandi sa pasyente nga nag-agi og dialysis sa susamang panahon.
Dugang pa nga daghanang mga pasyente ang mas gikinahanglan karon og organ donation aron mapatas-an pa ang ilang kinabuhi.
Sumala pa sa DOH, kabahin sa 90,000 ka mga Pilipinong nag-dialysis ang 2,400 ka mga pasyente sa Davao Region nga ikatulo sa dunay pinakataas nga ihap gikan sa maong statistika.
Adunay duha ka klase sa tawong nagdonar, nga pwede ang buhi o ang nitaliwan na. Apan parehas gihapong legal sa nasud ang proseso sa pagtanggal sa usa ka himsog nga organ o tissue ug pagbutang niini sa laing pasyente pinaagi sa surgery.
Kinahanglang muagi ang usa ka 18 o 21 ngadto 60 anyos nga donor og serye sa screenings sulod sa upat hangtud unom ka bulan. Aduna sab dapat katakus ug consent ang usa ka donor una pa man siya ipasailawom sa organ transplant.
Gipaklaro sab sa eksperto nga dili ginabaligya ang organ sa lawas sa tawo.
Sanglit, tumong niini ang madugtungan ang kinabuhi sa tawo pinaagi sa pagdonar sa iyang organ.
via || Bombo LJF
