DAVAO CITY – Pasado na sa ikatulong pagbasa sa Davao City Council ang usa ka ordinansa nga magtukod ug pre-emptive ug forced evacuation system alang sa mga kalamidad ug emerhensya.
Ilawom sa maong ordinansa, gikatakdang silotan ang mga residente nga mapakyas sa pagsunod sa pre-emptive evacuation system panahon sa kalamidad.
Ang maong lakang, nga gisang-at ni First District Councilor Luna Acosta sa miaging tuig, nagtumong sa pagsiguro sa kaluwasan sa mga Dabawenyo, ilabina niadtong nagpuyo duol sa mga bahaunong lugar, panahon sa mga kalamidad sama sa pagbaha ug mga insidente sa sunog.
Lakip sa ordinansahon ang silot nga P1,000 sa unang paglapas, P3,000 sa ikaduhang paglapas, ug P5,000 sa ikatulong kalapasan alang niadtong magdumili sa pagsunod sa pre-emptive evacuation system.
Gihatagan og gibug-aton ni Alfredo Baloran, ang hepe sa Davao City Disaster and Risk Reduction Management Office nga dili kini makadaot sa kaayohan sa mga biktima sa mga katalagman apan gisiguro nga ilang sundon ang ordinansa.
Namatikdan usab niya nga pipila ka mga residente ang nakiglalis sa mga awtoridad, ug mga responder nga nagtumong lamang nga dad-on sila sa luwas nga mga lugar.
Gipunting sa opisyal nga wala magpasabot ang ordinansa nga mabutang sa peligro ang kaayohan sa mga biktima sa baha apan pagsiguro nga ilang sundon ang maong ordinansa.
via || Bombo LJF
