Gipahibalo sa Public Employment Services Office (PESO) sa Davao City nga ang ordinansa nga nagtinguha sa paghatag og dugang oportunidad sa trabaho para sa mga senior citizens kasamtangang gisusi na sa City Legal Office. Matud ni PESO-Davao manager Llibeth Pantinople, kini usa ka importante nga lakang aron mapadayon ang proseso sa pag-apruba sa maong ordinansa ug mapasaka na kini sa Konseho sa Siyudad.
Gisuportahan usab sa duha ka dagkong food chains ang maong inisyatibo, ug andam silang mopirma og Memorandum of Agreement (MOA) uban sa PESO kung aprobahan na ang maong ordinansa. Kini nga paningkamot nagsubay sa sugyot ni Konsehal Diosdado Mahipus Jr. sa iyang privilege speech niadtong Oktubre 10, 2023, diin iyang gipasiugda ang papel sa mga senior citizens sa katilingban, nga bisan sa ilang edad, aduna pa silay kapasidad nga motampo sa komunidad.
Kahinumdumang gibutyag sa konsehal nga ang mga seniors nga makatrabaho sa fast food chains dili kinahanglan nga mabug-atan sa ilang buluhaton. Tungod ang ilang mga tahas kasagaran maglakip lamang sa pagdawat og order, pagserbi og pagkaon ug ilimnon, ug ubang yano nga trabaho. Base sa datos sa Social Welfare Operation Division, sukad pa sa tuig 2024, adunay kapin 170,000 ka senior citizens sa Davao City nga posibleng makinabang sa maong programa.
