Gipangulohan ni Pang. Ferdinand Marcos Jr. ang paglusad sa Oplan Kontra Baha, nga unang ipatuman sa pipila ka lugar sa Metro Manila, partikular na sa Parañaque City.
Sumala sa Presidente, kini nga programa usa ka panaghiusa tali sa gobyerno ug pribadong sektor, ug ang unang phase niini molungtad og siyam ka bulan.
Sa pamahayag ni Marcos, iyang gibutyag nga dakong hinungdan sa pagbaha mao ang siltation, o ang sobrang pagkababaw sa mga spillway.
Usa usab sa mga rason mao ang pagtapok sa mga basura.
Tungod niini, usa sa unang buhaton mao ang paglimpyo sa mga spillway ug estero aron mas mapalalom ang agianan sa tubig.
Matod pa sa Presidente, kinahanglan nga mukalot og mga 10 feet sa mga kanal o agianan sa tubig aron epektibo ang pag-agos niini.
Gipasabot usab ni Marcos nga dili kini usa ra ka higayon nga buhaton, kondili padayon nga programa aron masulbad ang problema sa pagbaha.
Gidugang pa sa Pangulo nga kung mahuman ang proyekto, mga 60 porsyento sa mga pagbaha ang posibleng makunhod o maminusan ug basin mas dako pa tungod kay lakip usab nga ayohon ang mga pumping stations.
Giklaro usab sa Pangulo nga lamang kini ipatuman sa Metro Manila, apan lakip na usab sa Cebu, Bacolod, Ilocos, Pangasinan, Davao, ug ubang urbanized cities sa tibuok nasud.
