DAVAO CITY – Sugdan na karong semanaha sa Philippine Coast Guard (PCG) Davao ang ilang “Oplan Guyod” operation diin target niini nga pangsikupon ang mga dili rehistrado nga mga water vessels nga naglawig sa Davao gulf.
Matud pa kang PCG Commander George Maganto nga ang ilang registration alang sa Safety, Security, and Environmental Numbering System (SSENS) diin sakop niini ang mga kadagatan nga sakop sa Davao region partikular na ang Barangay sa Pantukan, Compostela Valley paingon sa Malalag, Davao del Sur ang gisugdan kaniadtong Hulyo sa milabay nga tuig.
Tumong niini nga mamonitor ang aktibidad sa mga sea vessels ug masikop kadtong nagapahigayon ug illegal activities, terrorism, kidnapping, piracy, smuggling, ug uban pang criminal activities.
Makatabang sab ang maong lakang aron madakpan kadtong mga kriminal nga molatas sa mga entry point sakay ang water vessels pasulod dinhi sa siyudad.
Sa higayon nga magsugod na ang Oplan Guyod, i-impound na kadtong mga vessel ug dili kini makuha sa nanag-iya hangtud nga dili maka-presenta ug mga gikinahanglan nga dokumento.
