Gipaneguro sa Land Transportation Franchising Regulatory Board (LTFRB) nga manubag usab ang mga operators ug mga pampasaherong bus dili lamang ang mga drivers sa higayong malambigit sa aksidente sa kadalanan ang ilahang mga unit.
Gipahayag ni LTFRB Spokesperson Atty. Ariel Inton, kini ang subay na usab sa mas gipahugtang operasyon sa ahensya.
Ang nahisgutang lakang sa ahensya ang kabahin sa pagsunod sa zero tolerance policy batok sa reckless driving.
Apan dili lamang karong panahon sa semana santa ang hugot nilang pagbantay ug pagkompronta sa mga reckless driver apan dugay na.
Ubos sa pagdumala sa operator ang mga driver, sila ang mikuha sa serbisyo sa mga nahisgutan hinungdan nga angay usab sila ang hugot mupatuman sa mga requirement sa pagmaneho sa pampublikong transportasyon.
Pahinumdum sa LTFRB sa mga driver nga magmaampingon sa pagmaneho, gikinahanglang adunay insaktong tulog, wala naka-inom sa ilimnong makahubog o naka-droga.
Alang sa mga operator, gikinahanglang seguruhong anaa sa maayong kahimtang ang ilahang mga unit, mi-agi sa regular nga inspeksyon ug walay bisan unsang daot aron makalikay sa aksidente sa dalan.
