Nanawagan ang Philippine Drug Enforcement Agency (PDEA) sa publiko nga makigtambayayong ug motabang sa ilang community engagement program nga gitawag og ‘Operation: Private Eye (OPE)’.Ubos sa Operation: Private Eye, mahimong mata sa komunidad ang katawhan batok sa pagpanagtag ug pag-abuso sa ilegal nga droga.
Pinaagi sa aktibong pagreport sa mga kalihokan, paggamit, ug pagpamaligya sa ilegal nga droga, makadawat og reward ug insentibo ang mga molihok isip impormante.Apil usab sa ilang gidasig nga isumbong mao ang pag-ila sa mga personalidad sa droga, ilang mga operasyon, ug posible nga tinubdan sa ilegal nga droga.
Sumala ni PDEA Director General Undersecretary Isagani Nerez, igarantiya sa ilahang buhatan nga confidential ang identity sa bisan kinsa nga impormante. Ang ilang mga impormasyon isumite sa hugot nga deliberasyon aron matino ang kaangayan sa paghatag og ganti. Alang sa mga gustong mo-report, magamit ang OPE Hotline Number: 0917-867-7332.
Sa unang quarter sa 2025, nakahatag ang PDEA og kinatibuk-ang P7 milyon nga cash reward ngadto sa 16 ka mga impormante, nga nahimong hinungdan sa 22 ka mga malampusong anti-illegal drugs operations sa nagkalain-laing bahin sa nasud.
