Opisyal na nga mubyahe ang mga DC buses ning dakbayan sa Davao alang sa libreng-sakay sugod karong Disyembre 5.
Kahibaloang, kagahapon gipahigayon na usab ang pinning ceremony alang sa 22 bus drivers nga maoy mumaneho sa 10 ka mga DC buses.
Sumala pa ni Atty. Tristan Dwight Domingo, ang project manager sa DC bus project, ang maong mga drivers nga nakasulod sa maong programa sagad usab mga jeepney drivers nga wala pa nakamaneho og bus diin ilaha kining gi-prioritize ingon man dako ang epekto kanila kun ugaling i-phase out ang mga jeep.
Kini ang hinungdan nga gitrain usa nila ang maong mga drivers nga mumaneho og bus alang sa kaayuhan sa tanang dabawenyos nga musakay.
Dugang pa ni Domingo, daghang mga jeepney drivers ang nag apply sa ilahang opisina diin 22 usab niini ang gipili.
Alang usab sa pagpaklaro, ang maong mga bus mubyahe sulod lamang ning dakbayan isip pag akomodar sa komyuters ilabi na kada rush hour ug ting-ulan.
Sagad sa maong mga ruta diin mubyahe ang maong mga bus mao usab ang ruta sa:
Toril to sandawa
Mintal to roxas
Buhangin to roxas
Bangkal to roxas
Roxas to panacan
Panacan via Angliongto to Roxas
Ang maong mga bus adunay 45 ka mga regular seats, 15 ka mga standing ug 2 ka seats alang sa mga PWDs. Adunay 9 usab ka mga cameras sulod sa kada bus.
Kabahin niini, padayong ginapahinumduman no Domingo ang katawhan nga kanunayng i-monitor ang mga panghitabo sulod sa bus ug gipanawagan ang mga dabawenyos nga mahimong disiplinado ug dili magbilin og hugaw sa bus.
