Gipahibalo sa Office of the Ombudsman nga plano niini nga mas palig-onon pa ang mga lakang batok korapsyon.
Sa gipresentar ni Ombudsman Jesus Crispin “Boying” Remulla nga 7 ka estratehiya atol sa 2025 Anti-Corruption Summit, usa sa ilahang plano ang pagtukod og “Ombudsman Marshal.”
Sumala sa opisyal, ang paghimo og ingon niini nga “enforcement arm” nagtumong aron masiguro nga tumanon ang trabaho ug ipatuman ang mga mando nga ipagawas sa buhatan.
Buot usab niini nga masiguro nga mabantayan ang proteksyon ug kaluwasan sa ilahang mga imbestigador aron walay makasamok sa ilahang misyon nga mahatud ang hustisya.
Dugang pa niya, uban nila sa inisyatibo ang pipila ka ahensya sa gobyerno sama sa Philippine National Police, Department of Justice, Department of Information and Communications Technology, ug uban pa.
Lakip usab sa mga estratehiya ni Ombudsman Remulla ang pagpalig-on sa disiplina sa trabaho, gumikan nagtuo siya nga dili angay usikan ang oras sa pakigbatok sa korapsyon.
Iyang gibutyag nga ang paglangan ug kawalay aksyon nga naghatag og kahigayunan nga modaog ang kahiwi-an, busa mahinungdanon nga adunay nahuman matag-adlaw.
Tungod niini, iyang gibutyag nga ang isyu sa korapsyon dili angay biyaan o ipalabay lamang, kondili kinahanglan kining atubangon ug solusyonan pinaagi sa usa ka sistematikong pamaagi.
