Nagpakita og pagsalig si Ombudsman Jesus Crispin “Boying” Remulla nga mobalik sa Pilipinas sila Sen. Loren Legarda ug iyang anak nga si Batangas Rep. Leandro Leviste bisan pa sa ilang paggawas sa nasud atol sa nagpadayong imbestigasyon sa Office of the Ombudsman.
Sumala ni Remulla, giimbestigahan ang mag-inahan may kalabotan sa mga reklamong plunder ug graft nga gipasaka batok kang Leandro Leviste ug sa iyang renewable energy company. Matud pa niya, nagtuo siyang mopauli gihapon ang duha, apan gipasidan-an nga mahimo silang atubangon sa angayng legal nga mga lakang kon dili sila mobalik sa nasud.
Samtang, gipatin-aw ni Sen. Legarda nga ang iyang paggawas sa Pilipinas kabahin sa una nang naaprubahang medical leave gikan Agosto 3 hangtod Agosto 5, subay sa mga lagda sa Senado. Gihangyo usab niya ang publiko nga dili ilambigit ang iyang biyahe sa iyang gitawag nga walay basehan ug bakak nga mga alegasyon batok kaniya.
Kahinumduman, una nang gibutyag sa National Bureau of Investigation (NBI) nga mibiyahe si Legarda paingon sa France, samtang si Leandro Leviste miagi una sa Hong Kong sa wala pa mopadulong sa maong nasud.
Dugang pa niini, nagsang-at usab og reklamo ang Department of Energy (DOE) sa Department of Justice (DOJ) batok kang Leviste ug pipila ka opisyal sa Solar Para sa Bayan Corporation tungod sa giingong kapakyasan sa paghatag og suplay sa kuryente sa mga hilit nga komunidad, sumala sa mga kondisyon sa ilang prangkisa.
