Nakaandam na ang Office of the Ombudsman nga maghatag og proteksyon sa ni-resign nga magbabalaod nga si Zaldy Co human kini nagpahayag nga nahadlok alang sa iyahang kinabuhi.
Sa unang video nga gipagawas ni Co niatong Biyernes, iyang gibutyag nga sa dihang hapit na siya mopauli sa Pilipinas, gitawagan sumala pa siya ni kanhing House Speaker Martin Romualdez ug giingnan nga dili na siya mubalik sa nasod ug gibaharan sumala pa nga patyon siya kung mosulti batok kanila.
Gikanayon usab ni Co nga gigamit siya isip panakip-butás sa kampanya sa administrasyon batok sa korapsyon.
Sa usa ka pahayag kagahapong adlawa gipamugos sa Ombudsman nga ang kaluwasan sa usa ka testigo mahinungdanon sa pagpangita sa kamatuoran.
Dugay na usab nga abri ang pultahan sa Ombudsman alang sa kanhing magbabalaod aron ipresenta ang iyang ebidensya, ug kung kahadlok ang hinungdan sa iyang paglikay, gipasalig sa Ombudsman nga hatagan siya og proteksyon.
Wala niuyon ang Ombudsman sa paagi ni Co sa pagpagawas sa iyang bahin pinaagi sa video inay nga mosaysay sa opisina.
Busa, ilahang susihon pag-ayo ang gipadayag ni Co sama sa proseso nga gi-agian sa tanang testigo.
Bisan pa man gi-ila nga usahay hinay ang proseso, gibutyag sa Ombudsman nga kini ang paagi aron masiguro nga lig-on ang hustisya ug dili lamang puro hungihong.
Sa katapusan, gihangyo sa Ombudsman si Co nga mopauli na sa nasod, isumite ang iyang sinulat nga pahayag, ipaberipika ang iyang mga gipahayag, ug moagi sa susama nga proseso nga giagian sa tanan testigo.
